अधिकाऱ्यांचे बूट सोन्याचे असतात का हो ?

सरकारी अधिकाऱ्यांचे बूट सोन्याचे असतात का हो ? नाही ना ? मग एक किस्सा सांगतो . मागच्या आठवड्यात एका सरकारी कार्यालयात कामानिमित्त गेलो होतो .काम तसे किरकोळ आणि नियमांच्या चौकटीत बसणारे होते .पण शेवटी ते सरकारी काम होते आणि त्याची शेंडी एका जबाबदार अधिकाऱ्याकडे होती .त्यांना भेटण्यासाठी कार्यालयात गेलो तर दरवाज्यातच चपला बुटांचा खच पडलेला होता .एक चप्पल कुठे तर दुसरी कुठे अशी अस्ताव्यस्त परिस्थिती होती .दरवाज्याच्या बाहेर कागदाचा बोर्ड लावलेला होता ,`पादत्राणे बाहेर काढावीत `!!. मी बोर्ड वाचला आणि पायाजवळील पसारा पाहिला.आपण जर येथे बूट काढले तर परत शोधायला अर्धा तास लागेल असे मनोमन वाटले.बूट काढावेत की नाही याचा विचार करीत असताना सहज म्हणून कार्यालयात डोकावले तर टेबलाखालून साहेबांचे बूट वाकुल्या दाखवत होते. साहेबांच्या आजूबाजूला बसलेल्या सहकाऱ्यांच्या टेबलाखाली नजर मारली तर सर्वांचे बूट चप्पल वाकुल्या दाखवत होते.म्हणून मी मोठ्या हिमतीने बुटांसहित कार्यालयात प्रवेश केला .कार्यालयात इतर टेबलांवर गर्दी होती .बरीच जनता आपला नंबर केव्हा येतो याची वाट पाहत बाकड्यांवर बसलेले होते.अर्थात सगळ्यांनी शिस्तीत चप्पल बूट बाहेर काढलेले होते.तेवढ्यात कार्यालयातील शिपाई महिला माझ्यावर ओरडत आली व बूट बाहेर काढायला सांगितले .शिपाई मावशी वयस्कर असल्यामुळे मीही नमते घेतले व सांगितले ,`मावशी ,मी बूट काढतो पण तुमच्या सर्व कर्मचाऱ्यांच्या पायात बूट चप्पल आहेत.त्यांनाही काढायला सांगा .`मावशी मात्र आता भडकल्या होत्या आणि काहीतरी गडबड चालू आहे असे साहेबांसहित सर्वांना कळून चुकले होते .मीही सर्वांना ऐकू जाईल असा आवाज चढवला आणि विचारले , येणाऱ्यांनी बूट बाहेर काढायचे आणि तुम्ही लोकांनी बूट घालून बसायचे हा कुठला न्याय आहे ? साहेबांचे बूट काय सोन्याचे आहेत काय ? शेवटी साहेबांनी बोलावून घेतले आणि काय कामासाठी आले याची चौकशी केली .काम अडवणूक करण्यासारखे नव्हते म्हणून झटपट झाले.पण साहेबांना वरून डोस देऊन आलो . ठीक आहे ,चप्पल बूट बाहेर काढले पाहिजेत.पण त्यासाठी एखादी मांडणी तर ठेवा .म्हणजे असा पसारा होणार नाही आणि टापटीप ही दिसेल.साहेबांनी सूचना मान्य केली आणि लवकर तशी व्यवस्था करण्याचे आश्वासन दिले .